KOK-u bën kategorizimi i sporteve, Majlinda Kelmendi iu prinë sportistëve

0

Komiteti Olimpik i Kosovës ka bërë kategorizimin e sporteve, duke e ndarë në katër kategori, në atë A, B, C dhe D

Pas një pune më shumë se një muajshe të Komisionit për vlerësimin e kategorizimit të sporteve, sportistëve dhe trajnerëve, drejtuesit e Komitetit Olimpik të Kosovës kanë publikuar të mërkurën kategoritë në të cilat janë përfshirë federatat, sportistët dhe trajnerët.

Sponzor

Kategorizimi i sporteve është ndarë në katër kategori, A, B, C dhe D. Në kategorinë A janë vendosur Federata e Xhudos e Kosovës dhe ajo e Karatesë nga sportet individuale dhe katër federatat ekipore (futbolli, hendbolli, basketbolli dhe volejbolli).

Presidenti i Komitetit Olimpik të Kosovës, Besim Hasani, tha se komisioni ka bërë punë të madhe në kategorizimin e sporteve, sportistëve dhe trajnerëve dhe se pas një kohe të gjatë po përfundon një çështje që ka zgjatur me vite.

“Pas një periudhe të gjatë dhe pas një pune jashtëzakonisht të madhe që kanë bërë komisionet e ndryshme, disa prej të cilëve i takojnë edhe pjesëtareve të Bordit Ekzekutiv të Komitetit Olimpik të Kosovës të përbërjes së kaluar, por që ka përfunduar para disa ditëve dhe sot do ta bëjmë prezantimin e këtyre kategorive dhe kjo rrjedh edhe si rezultat i kërkesës së Ministrisë për Kulturë, Rini e Sport, që këtë kategorizimin t’ia besoj pikërisht përfaqësuesve të KOK-ut si organizatë qendrore, kulmore dhe joqeveritare”, ka thënë presidenti Hasani, në konferencën për media.

Hasani theksoi se me kategorizimin e sporteve, Kosova po afrohet me vendet që e kanë të zhvilluar sportin.

Kryetari i Komisionit për kategorizimin e sporteve, sportistëve dhe trajnerëve, Shasivar Haxhijaj, duke lavdëruar punën e komisionit, tha se kategorizimi është në fazën përfundimtare të saj.

“Sipas rregullores kategorizimi i sporteve bëhet në katër kategori. Në kategorinë A, sipas dokumentacioneve dhe kritereve që kanë ardhur në Komitetin Olimpik të Kosovës, komisioni e ka përcaktuar Federatën e Xhudos së Kosovës, e cila ka marrë 83.1 pikë, Federata e Futbollit të Kosovës 77.37, Federata e Karatesë së Kosovës e treta 70.79, Federata e Hendbollit të Kosovës 67.80, Federata e Basketbollit të Kosovës 66.90, Federata e Volejbollit të Kosovës 65.94, këto janë gjashtë federata që janë në kategorinë e parë”, tha Haxhijaj.

Shtatë federata tjera e përbëjnë kategorinë e dytë si: Atletika, boksi, noti, pingpongu, skitaria, tenisi dhe peshëngritja. Federatat tjera ndodhen në kategorinë C, kurse e vetmja në kategorinë D, është Federata e Minigolfit.

Haxhijaj më pas bëri të ditur edhe vlerësimin për sportistët, ku kampione në këtë kategori është Majlinda Kelmendi, me 100 pikë, për shkak të medaljes së artë olimpike. Nga xhudoja, renditjen e pasojnë edhe Distria Krasniqi (40 pikë), Nora Gjakova (40), Akil Gjakova (37.5), Loriana Kuka (20), Laura Fazlija (10), Shpat Zeka (10). Nga karateja është Herolind Nishevci me 60 pikë, kurse nga bodybuildingu vijnë Jetmir Goqi (35 pikë) dhe Gentiana Beqa (30 pikë).

Trajneri i xhudistëve, Driton Kuka, kampion olimpik, ka fituar 131.5 pikë, bazuar në sukseset e xhudistëve të lartëpërmendur. Në kategorizimin për trajnerë ndodhen edhe Shqipe Zogiani (30 pikë), trajnere e Herolind Nishevcit dhe Burim Ramiqi (17.5 pikë) e Dren Beqa (15 pikë), trajnerë të bodybuildingut.

Federatat tjera nuk janë vlerësuar për shkak të mos zhvillimit të aktiviteteve të tyre në vitin e kaluar, kurse disa për shkak të mos marrjes së licencës nga MKRS.

Në konferencë ishte i pranishëm edhe Gazmend Maxhuni, anëtarë i Komisionit, derisa pjesë e Komisionit ishin edhe Agron Kuka, Shqipe Zogiani dhe Kushtrim Krasniqi.

Kategorizimi është bërë në bazë të Rregullores për kategorizimin e Sporteve, sportistëve dhe trajnerëve.

KATEGORIZIMI I SPORTEVE

Kategoria “A”

1. Federata e Xhudos e Kosovës 83.10 pikë

2. Federata e Futbollit e Kosovës 77.37 pikë

3. Federata e Karatesë e Kosovës 70.79 pike

4. Federata e Hendbollit e Kosovës 67.5 pikë

5. Federata e Basketbollit e Kosovës 66.9 pikë

6. Federata e Volejbollit e Kosovës 65.49 pikë

Kategoria “B”

7. Federata Atletike e Kosovës 56.74 pikë

8. Federata e Boksit e Kosovës 51.55 pikë

9. Federata e Notit e Kosovës 50.03 pikë

10. Federata e Pingpongut e Kosovës 47.99 pikë

11. Federata e Skitarisë e Kosovës 47.69 pikë

12. Federata e Tenisit e Kosovës 46.01 pikë

13. Federata e Peshëngritjes e Kosovës 45.1 pikë

Kategoria C

13. Federata e Shigjetarisë e Kosovës 44.55 pikë

14. Federata e Çiklizmit e Kosovës 44.4 pikë

15. Federata e Shenjëtarisë Sportive e Kosovës 43.66 pikë

16. Federata e Mundjes e Kosovës 41.9 pikë

17. Federata e Shahut e Kosovës 35.6 pikë

18. Federata e Boulingut e Kosovës 34.8 pikë

19. Federata e Bodybuldingut e Kosovës 34.55 pikë

20. Federata e Autosporteve e Kosovës 33.5 pikë

21. Federata e KickBoksit e Kosovës 32.2 pikë

22. Federata e Aeronautikes e Kosovës 28.2 pikë

Kategoria D

23. Federata e Minigolfit e Kosovës 16 pikë

Federatat që nuk janë vlerësuar

Federata e Taekwondosë e Kosovës, Federata e Pentatlonit Modern, Federata e Lundrimit, Federata e Kërlingut, Federata e Sportit Shkollor, Federata e Sporteve Universitare e Kosovës, Federata e Bjeshkatarisë, Federata Sportive e Punëtorëve e Kosovës.

Kategorizimi i Sportistëve

Majlinda Kelmendi Sportiste e merituar 100 pikë

Distria Krasniqi, Sportiste ndërkombëtare 45 pikë

Nora Gjakova, Sportiste ndërkombëtare 40 pikë

Akil Gjakova, Sportist ndërkombëtare 37.5 pikë

Loriana Kuka, Sportiste ndërkombëtare 20 pikë

Laura Fazlia, Sportiste ndërkombëtare 10 pikë

Shpat Zeka, Sportist ndërkombëtare 10 pikë

Herolind Nishevci, Sportist botëror 60 pikë

Jetmir Goqi Sportist botëror 35 pikë

Gentiana Beqa Sportist botëror 30 pikë

Kategorizimi i trajnerëve

Driton Kuka, Trajner i xhudos 131.5 pikë

Shqipe Zogiani, Trajnere e karatesë 30 pikë

Burim Vraniqaj, Trajner i bodybuildingut 17.5 pikë

Dren Beqa, trajner i bodybuildingut 15 pikë

-Sponzor-